Luk 24 | ASO | STEP | Ne'mine igi mini gili minisa a'mine Zuda veti holise'ine Salele nene osu' lavo Sadeu' nedenga' holukati' nene a'mine vene' ingine a'mine gonosolo' hilaa' ani' uveli di va'va' igi milani' ma nene di gonoso galesela vani' ve.

Luke 24

Izesu' Hele Mininguti' Gohi Otine' Gamazi Gizine'

(Mataio' 28:1-10; Maleko' 16:1-8; Zohane' 20:1-10)

1 Ne'mine igi mini gili minisa a'mine Zuda veti holise'ine Salele nene osu' lavo Sadeu' nedenga' holukati' nene a'mine vene' ingine a'mine gonosolo' hilaa' ani' uveli di va'va' igi milani' ma nene di gonoso galesela vani' ve. 2 Vi heteli ningani' nene a'mine gonoso galeseli'mi velelo' geheni naba di tilikani' ma nene velehe' mili hulikeni' neivo ningisa 3 ingine a'mingu' dizi vi ningani' nene a'mine gonoso Izesu' oko'no've nene nomivo ma ningamani' ve. 4 Ma ningami a'minemu' nene gopo ga'ine gili nizavo aizo, evene' sita' ma lite' li soto' igi vene' minada nene oti minasine' ve. A'mine veti oko'nido' inite' ne'mo nene ve'ne ve'ne lo minine' ve. 5 Ne'mine ivo nizasivo vene' ingine golise gili ngehelele noizivo gubi' izi misubouko go'ine ve'ine nihulavo ve sita' ingine ti' li li-ngimasine': Velesi neivemu' nene hilavetingu' mene nanimu' vise' nave. 6 Aza nene meu' nomine'za asi mo kululu' izo otave. Ido' lingine nGalilaia misubouko velesi ha mino ti' lo lo-lingimine' mamu' gili' nalo: 7 O'mosolati' ve gihile naza nene monovo goloso daa' aveti a'ningu' nele'mizi milikevo lohoto' zalo' nibili hilikevo gamene sito hamo minosa gohi otelesuve. 8 Ne'mine lo neine' ma neive li likesivo vene' ingine gomu' a'mine ne'mine line' mala gohi ga'ine gilii 9 gonoso galese nene hulii gohi tine' mili numu'nida vi ei' Izesu' izipahala zuho leveni engikisi ido' minani' aleve linge muki' nesi nene a'mine ningani' inite' muki' nemu' nene vetete' igi li-ngimi osu' lani' ve. 10 A'mine ningani' initekumu' aposolo li-ngimani' vene' nene Zoana' ve Zakobo' izeleho Malia' ve ido' Mangadala ebetoti' vene' Malia' ato' gohi ma ve ido' vene' ma maka' monani' vene' nete nene li-ngimani'za 11 ingine aposolo nete nene a'mine venelite li-ngimani' gamazi nene abelenga gamazi nilave lii gili ele'vole' amani' ve. 12 Ne'mine ani'za Petolo' nene oteko loti' izo gonoso galesela vo hetelo a'mingu' gubi' izo ningine' nene inite' ma nomivo Izesu' oko'nolo' asabu' izani' lavolavo mavo' nene ha neivo ningo a'mine soto' ine' initekumu' nene gala gele'mo gele'mo numuda tine' molo vine' ve.

Izesu'ni E'metaveuti' Ve Sita' Ma Emausi Numuda Nivasivo Izesu' Soto' O-ngimine' Gamazi Gizine'

(Maleko' 16:12-13)

13 Ido' a'mine Izesu' galeseu' nomivo ningani' gameneu' nene Izesu'ni e'metaveuti' ve sita' ma Emausi numuda vilisa vasine'. A'mine numuno ebe' nene Zelusalemi numuno ebetoti' leveni kilomita (seveni maili) ne'mine minine' nenako 14 ingine a'mine Emausila vilisa akalo' nivi nivi a'mine Izesu'ni bilani' gamazi nemu' vetete' igi li volelo' melo' i'mi vasine' ve. 15 Ne'mini gamazi li volelo' melo' igi li'mi nivasivo asi've Izesu' nene ogo a'mingu' maka' vine' ve. 16 Maka' engikisi vine'za ve sita' netisi ve'nido' nene hitavo Izesu' ve li ma ningi gilamasine' ve. 17 Ningi gilamasivo aza ti' lo longo' o-ngidine': Lingine gamazi li volelo' melo' igi li gili ha gele i'mi nivasine' nene nani gamazi li volelo' melo' i'mi nivasive. Ne'mine lavo ingine vi oti mini go'ine ve'ine di muhele' igi minasine'. 18 Ne'mine igi mini engikuti' gulive Keleopa' ve lo minive ne'mo Izesu' line' gamazilo' nene ti' lo lo-imine': Ve melo, venenga ve Zelusalemi numuno ebeku' imi nizani' netesi nene aize' okozo' a'mene soto' ine' inite' nemu' nene mo gili osu' li nizani'za gei' hamo' nene ma gelamabe. 19 Ne'mine lavo Izesu' aza ti' lo line': Inite' nanite' soto' ive. Ne'mine lavo ingine ti' li li-imasine': Laza gamazi lo volelo' melo' ogo lo'mo nousine' inite' nene Nasalete ve Izesu'ni mamu' nene nolusive. Aza nene O'moso'mo ningivo ido' evene' mukilite ningavo polohete mino gamazi laa' ido' inite' ogo molo oga' ine' nene ele'vole' ogovo' gamazi laa' ido' ogo molo oga' ine' ve. 20 Ne'mine oga' ine'za eveneto' medeli mini O'moso inite' lehizi-daa' ave nabatelitesi ido' leli' gizebo vete netesi nene Izesu'ni bili hililizave li goni' i-dikevo lohoto' zalo' bili hilani' ve. Laza nemu' nene lo'mo nousive. 21 Ne'mine igi bili hilani'za laza eikumu' nene gomu' ti' lo gele minune' ve: Evene' golosolite leli' Isilaele' aleve gizebo i-lidi minavo gelekele' o-ngedo minuninguti' aza nene do kuluhize-ledelive ma nene ei' ne neive lo gilune' ve. Ido' gamazi gohi ma nene a'mine inite' soto' idoti' nene gamene sito hamo ogo novine' nenako mo mudise inite' noloseive. 22 Ne'mine o neine'za idise leli' zuhouti' vene' linge malite igi gamazi ma likevo upuho' okune. Ingine nene gonoso galesela nedenga' holukati' vani' nene 23 a'mine gonoso ningami tine' mili numuda igi vamu' ne'mine vetelo' o molavo angelo' ma soto' i limi ti' li lasive li vetete' igi li-limave: Izesu' nene oto velesi neive. 24 Ne'mine li vene' nete li-limikevo lelikuti' malite gonoso galesela vi ningani' nene venelite lani' ma'mino neivo ningani'za ei' Izesu'ni nene oko'nolo' ma ningamave. 25 Ne'mine li li-imikesivo aza ti' lo eikumukisi lo-ngimine': Lingine nene ha evene' negi nizasive. Lingine polohetelite lani' gamazi muki' gili ele'vole' iga' ilisanako geni lingibiline' gelavo mini gamazi linge ma nene gili ele'vole' isa'masive. 26 Ido' do lungu' izelive lo O'moso'mo imiselelesa live nene mulumo alumo nite' gehosavo' alinge' nene Guvelesi ve lolo' ogo minaa' mo'mosi've labana'vesi minine' nene daloseive li gizi nizani' nenako a'mine gamazilo' e'meto do gihile izamiline' o neihe. 27 Ne'mine losa eikumu' mono' godolou' gizikani' gamazi muki' nene Mose' gizine' gamazi mukikuti' nene api' ogo lo ngolo' lo lo-ngeme'mo vo polohete mukilite gizangukotikisi nene lo-ngeme osu' line' ve.

28 Ne'mino lo-ngeme ngeme' ivo ingine vi a'mine velise vilisa asine' numuno ebe' Emausi nene di alitani' ve. Ne'mine igi aza nene a'mine numuno ebe' nene hulo ivile' oko volosa neivo 29 ve sita' ingine o've li-di ti' li li-imasine': Ho' nene mo lemo vo mo liti'muso izelido' o neize. Gaza nene lelikisi maka' ongalone likesivo gele ngemavo numunguko nene maka' vani' ve. 30 Mo numunguko dizi vi noso' nite' nalisa nene mito' minisa aza beleti ma dosa O'mosola opo'ni lo apilo ngimine' ve. 31 Ido' ve sita' nene ve'nido' hite minivo Izesu' neive li ma ningamasivo ani' ma neine'za beleti nene apilo nongimivo Izesu' neive li ninge lamine' asine'. Mo ninge lamine' nasivo maka' minadoti' nene gopo ogavo gohi ningamasine' ve. 32 Ne'mine ogavo ingine ti' li li volelo' melo' igi ti' li lasine': Aza nene akala unida gamazi lo-limingu' nene mono' godolouti' gamazi lo ngolo' lo lo-leme'mo navo luteu' gulumo liso minivo usine' ma nene ei' neive lo ningelosinako agae, nanimu' ningamusivo. 33 Ne'mine lisa lite' li oti Zelusalemi numuda tine' mili vasine' ve. Vi Zelusalemi numuda heteli ei' Izesu' izipahala zuho leveni nesi ido' inginesi maka' minaa' ave linge ma nesi nene mulise mili nizavo vi hetelikesivo ingine 34 ti' li ve sita' nene li-ngimani': Guvetesi ve ma nene mo lamineto' hilinguti' otosa Simoni'ni nene soto' o emave. 35 Ne'mine li ingine likevo ve sita' ingine Emausi numuno akala nivasivo Guvelesi ve aza vovo'ningu' soto' o ngemavo ingine ei' ve li ningi gilamasivo makato' vi numungu' dizi mini beleti gito apilo nongimivo eze ningi hehe lasine' nemu' nene vetete' igi li-ngimasine' ve.

Izesu' Aza Izipahala Zuho Soto' O-ngimine' Gamazi (Mataio' 28:16-20; Maleko' 16:14-18; Zohane' 20:19-23; Aposolo' 1:6-8)

36 Li-ngimikesivo izipahala zuho ingine a'mine gamazi nene li volelo' melo' igi nizavo Izesu' asi've nene vovo'ningu' soto' ogo ote mino ti' lo lo-ngimine': Muludingu' nene lamine' hongu lo minivo. 37 Ne'mine lo lo-ngimine'za ingine upuho' goloso igi ngehelele goloso izavo ingine nene holoso ne'mine ma noningube li ga'ine gilani' ve. 38 Ne'mine li nigilavo Izesu' aza ti' lo lo-ngimine': Lingine upuho' igi lutingu' gopo gatine nigilani' nene nanimu' nigilave. 39 Lingine idise niningani' oko'ne ne'mino holoso neve oko'inesi amuzohaza'inesi nene mo nomine' nizani' nenako nemu' naza mene neni' ma nene nouze. Lingine gize'ne a'nelo' hu'ne mene ningi oko'nelo' nesi di gili ningi gililo. [ 40 Aza ne'mine lo lo-ngemosa gizene analo' bilani' hulo nene do ngelebizine'.] 41 Ne'mine ine'za ingine nene lolize izaa' inite' atoli'mine goloso nene lelita ngelo soto' ilihe lisa Izesu' ma nene mo galeseuti' otave li gili ele'vole' ami gopo ga'ine ha gili nizavo Izesu' aza noso' nite' ma milahe milamave lo line'. 42 Ne'mine lavo izipahala zuho ingine alaha' oloto' milivi' divi' igi gizani' ma di imikevo 43 dosa ningi nizavo nani'.

44 Ido' Izesu' ti' lo izipahala zuho lo-ngimine': Naza gomu' linginesi maka' haza minunido' ma nene ti' lo lo-lengemaa' uvoni' ma neive: Mose' lou' gamazi ido' O'moso'mi veleti' gamazi li soto' iga' avete gizani' gamaziu' ido' O'moso di naba i-di laa' ani' nama gizangu' nenikumu' li mili luhuvo gizani' gamazi nene gihile ize osu' lilido' o neive lo lo-lengemaa' uvoni' ma neive. 45 Ne'mine lo lo-ngemo a'mine mono' godolou' luhuvo eikumu' gizani' mamu' nene gili ngolo' li gililizave lo lu'ine ga'ine do ngolose-ngidine'. 46 Ne'mine o-ngedo ti' lo lo-ngimine': Mono' godolou' nene do lungu' izelive lo O'moso'mo imiselelesa live aza nene mulumo alumo gelo helosa gamene sito hamo mino hilinguti' gohi oteleseive li gizi nizani' ma neive. 47 Ido' ne'mine ogavosa evene' nene lutine di velepe' izikevo O'moso'mo lihimetine hulo-lengedeleseive li Zelusalemi numuno ebekuti' api' igi ei' velemu' li-ngimi ngimi' i'mi moni evene' zuho ato ato' minani' muki' nene li-ngimilisave li gizi nizani' ma neive. 48 A'mine gamazi muki' nene gihile ize'mo novivo lingine ningi'mi nivani' nenako nemu' lengi' nene li soto' soto' iliza ve ma nene nizave. 49 Ido' gililo. Me'neho aza Sikalahu've nene lehize-lengedelesuve lo lo hukine' malo' nene e'meto imiselekuvo lengita lemeleseive. Lemeleseiha olihe Okulumokuti' lemo do amuzo molo-lengedamido' nene Zelusalemi numuno ebe' mene lite' li huli mala vami ha gizebo i minilo.

O'moso'mo Izesu'ni Okulumokuko Do Dizine' Gamazi

(Maleko' 16:19-20; Aposolo' 1:9-11)

50 Ido' Izesu' aza izipahala zuho nene ngele'mizo Betani numuno ebe' minida vo mino ana do hozi losa no'noho' ize-ngidine' ve. 51 Ne'mine o-ngedosa mo hulo-ngedavo O'moso'mo Okulumokuko ele'mizo do dizo vine' ve. 52 Okulumokuko dizo vavo izipahala zuho ingine di naba i-disa Zelusalemi numuda mulu'ningu' lamine' goloso gili tine' mili vi mini 53 gamene gamene mono' numuno nabau' nene dizi O'moso opo'ni li minaa' ani' ve.